Ésitu de participación nel II Alcuentru de Fútbol Popular Murcia 2015

Mientres la fin de selmana del 14,15 y 16 d’agostu nel Hotel Arco de San Juan de la ciudá de Murcia, diéronse cita numberoses asociaciones, medios y clubes populares del estáu español, asina como plataformes europees y equipos llegaos dende Inglaterra, Irlanda y Italia.

Ente los clubes participantes atopábense’l CAP Ciudad de Murcia cómo anfitrión, y cómo asistentes: Atlético Club de Socios, Avilés Stadium CF, CD Palencia, FC Tarraco, UC Ceares, UD Ourense, Xerez Deportivo FC, Ardita (Roma-Italia), Cork City FC (Irlanda), FC United of Manchester (Inglaterra). Amás, tamién allegaron FASFE (Federación d’Accionistes y Socios del Fútbol Español), Supporters Direct, con redes de participación a nivel européu; Asociaciones implicaes nel movimientu d’aficionaos: Plataforma ADRV (Rayo Vallecano), Unión Burgalesista (Burgos CF) y APMAE (Espanyol) y medios de comunicación ente los que s’atopaben: Wanderers el fútbol del pueblu, Panenka, La Opinión de Málaga y FANVOX.

Los distintos alderiques, talleres y esposiciones xiraron en redol a compartir esperiencies na forma de propiedá, xestión y organización d’un club popular. Nos trés díes que duró l’alcuentru, voceros de los distintos colectivos intercambiaron opiniones en virtú del crecimientu y espansión del movimientu del fútbol popular.

Ente otros, un de los oxetivos del alcuentru que llogró la unanimidá de los participantes foi responder a la interrogante de cuales son les premises a cumplir por un club de fútbol popular. Tres les diverses aportaciones, los representantes llegaron a unos puntos mínimos d’harmonía que definen la distinción que dota a una entidá deportiva de calter popular. L’alcuerdu implica que les característiques que tou club popular tien d’acreditar son:

1. El gobiernu tien de ser asambleariu, soberanu y responder a un sistema de valores y principios allegaos a la ética deportiva. La participación de los socios tien de ser activa y tien de tar lexitimada pola mesma entidá.
2. Tien d’aspirar a la participación nuna competición ideal. Curiar la cantera y los valores tradicionales qu’engrandeció al fútbol y evitar otros que malven los valores del deporte averándose a un fútbol mercantilizáu.
3. Criterios d’interacción social: Collaboración con colectivos susceptibles de marxinación pertenecientes a la comunidá qu’arrodia al club (discapacitaos, LGTB, inmigrantes, vecinos en riesgu d’esclusión social…), organizaciones civiles, alministraciones y aficionaos. Dicha promoción realizada n’actividaes lúdicu-recreatives y socioculturales tendrá de responder siempres a una formación en valores.
4. Tien de ser xestionáu con dilixencia informada d’un lleal alministrador social y esti va ser sofitáu por una xestión económica auditada, tributada, tresparente y d’accesu llibre.
5. La comunicación tien de ser veraz, ensin influencies y fácil d’entender por tolos aficionaos y medios de comunicación. Les iniciatives van ser espublizaes cola máxima eficacia y claridá a tolos niveles.

Un alcuentru bien interesante por tantu, que va ayudar a toos a siguir medrando, ameyorando y implicando a la masa social pa caminar xuntos na consecución d’estos oxetivos.